گلگت:۔ امام جمعہ و الجماعت مرکزی امامیہ جامع مسجد گلگت حجۃ السلام علامہ سید راحت حسین الحسینی نے خطبہ جمعہ دیتے ہوئے کہا ہے کہ شہید اسلام و قرآن، داعی اتحاد بین المسلمین، حجۃ الاسلام علامہ سید ضیاء الد ین رضوی کی شہادت کو چھ سال کا طویل عرصہ بیت جانے کے بعد بلاآخر پہلی مرتبہ شہید کے پیروکاروں کو شہید ؒ اور انکے ساتھیوں کے سنگین اور گلگت بلتستان کی تاریخ کے بدترین و دلخریش سانحے میں ملوث ماسٹر مائنڈ قاری ندیم استوری کی راولپنڈی سے گرفتاری کی خبر نے قدرے مطمئن کر دیا ہے اور اس حکومتی اقدام سے جہاں یہ بات ثابت ہوئی ہے کہ اگر ریاستی ادارے اپنی ذمہ داریاں نیک نیتی اور غیر جانبداری سے انجام دیں تو کوئی مجرم چاہے اسکے ہاتھ کتنے ہی لمبے کیوں نہ ہوں قانون کی گرفت سے بچ نہیں سکتا۔ وہاں اس واقعے سے یہ بات بھی عیاں ہوتی ہے کہ اگر معاشرے میں جزاء و سزاء کا قانون عملی طور پر نافذ ہو تو عوام کا حکومتی اداروں پر اعتماد بحال ہو سکتا ہے اور معاشرے سےفرقہ واریت، مذہبی انتہاپسندی، دہشت گردی اور انتہا پسندی جیسے ناسور جو بلا شبہ ملکی استحکام و سلامتی کیلئے بہت بڑا خطرہ ہیں سے باآسانی چھٹکارا پایا جا سکتا ہے۔